З гэтай нагоды быў запрошаны кандыдат філалагічных навук, пісьменнік і літаратуразнаўца Віталь Еўмянькоў, а таксама паэт, бард і перакладчык Аляксей Жбанаў.
Спадар Віталь адзначыў, што філаматы — не шараговая з’ява ў гісторыі Беларусі, а нацыятворчы фактар. Усе прысутныя пачулі цікавыя і малавядомыя факты пра Адама Міцкевіча і Тамаша Зана, пра Ігната Дамейку і Антонія Адынца.
У выкананні Аляксея Жбанава былі праспяваныя песні на словы філаматаў, і ўсе ўдзельнікі імпрэзы мелі магчымасць не толькі пачуць, але і выканаць разам неўміручыя творы беларускіх класікаў. Чаму класікаў? А таму, што ўжо пры жыцці філаматы сталі нацыянальнымі героямі ў сябе на радзіме.
Госці імпрэзы падрыхтавалі не толькі цікавы выступ, але і змястоуную фотапрэзентацыю з тэкстамі песень. Супрацоўнікі библіятэкі аформілі грунтоўную кніжную выставу, на якой былі як выданні пра філаматаў, так і іх творы.
Таварыства філаматаў (перакладаецца як «сябры навук») узнікла ўвосень 1817 года сярод студэнтаў Віленскага універсітэта.
Алег Дзьячкоў
Фота Наталлі Багдаванай